Interregionalt samarbeid skal rigge for vekst etter krisa

Kunnskapsparken i Sogn og Fjordane, Sognefjorden Næringshage, Stryn Næringshage og Inviro AS – tidlegare Nordfjordeid Næringshage er i gang med eit prosjekt; delfinansiert av Vestland Fylkeskommune, som skal auke kapasitet og kompetanse til bedrifter og næringsapparat gjennom krisetidene.

Målsetnaden med prosjektet er å hjelpe bedrifter som opplev utfordringar som følgje av Covid 19. Individuell rettleiing, nettverksaktivitetar og god kjennskap til dei nye tiltakspakkene skal sørgje for eit bredt, robust og utviklingsorientert næringsliv etter koronakrisa.

YNSKJER Å HJELPE SÅ MANGE SOM MOGLEG
Vi veit det er mange bedrifter som har sett moglegheiter i denne krisa, medan andre framleis held pusten og håper på det beste. Målet vårt er å nå ut til alle bedrifter som treng hjelp, anten det er gjennom å søkje på tiltakspakker eller jobbe med bedriftsutvikling, seier prosjektleiar Line Bjelde i Sognefjorden Næringshage. – Kontakten med bedriftene skal skje i tett dialog og samarbeid med kommunane sine næringsapparat, og dette meiner vi gir ei ekstra tryggheit. Ønsket vårt er at resultatet av prosjektet vil bli eit bredt, robust og utviklingsorientert næringsliv når kvardagen er tilbake etter koronakrisa, avsluttar Bjelde.

LOVER ENGASJEMENT
Vi er i ein ekstraordinær situasjon, og det må setjast inn ekstraordinære tiltak. Samstundes gjev situasjonen rom for nye samarbeid, nye metodar og behov for ny kunnskap seier Arild Hjelmeland, i Inviro. Med dette som utgangspunkt mobiliserer vi no eit interregionalt samarbeid for å støtte næringslivet vårt til omstilling, og rigge oss for ny vekst etter koronapandemien. –Vi håper alle som kjenner på ei usikkerheit rundt eiga bedrift vil ta kontakt med sin nærmaste næringshage eller kommunane sine førstelinjetenester; og så lover vi at det kjem konkrete tiltak etter kvart, som gjer det enklare for bedriftene å engasjere seg avslutter Hjelmeland.